న్యూఢిల్లీ: మ‌రో ఏడాదిలోపు ఇండియాలో టోల్ ప్లాజాలు మొత్తం ఎత్తేస్తామ‌ని, జీపీఎస్ ఆధారిత టోల్ సేక‌ర‌ణ చేప‌డ‌తామ‌ని కేంద్ర రోడ్డు ర‌వాణా, హైవేల శాఖా మంత్రి నితిన్ గ‌డ్క‌రీ చెప్పారు. ఇప్ప‌టి వ‌ర‌కూ దేశంలో 93 శాతం వాహనాలు ఫాస్టాగ్ వాడుతున్నాయని, మిగిలిన 7 శాతం వాహ‌నాల‌కు రెట్టింపు టోల్ వేసినా ఇంకా ఫాస్టాగ్ తీసుకోలేద‌ని ఆయ‌న తెలిపారు. గురువారం లోక్‌స‌భ‌లో ప్ర‌శ్నోత్త‌రాల సంద‌ర్భంగా గ‌డ్క‌రీ ఈ విష‌యాన్ని చెప్పారు. దేశంలో ఏడాదిలోపే భౌతిక టోల్ ప్లాజాల‌ను మొత్తం ఎత్తేస్తామ‌ని స‌భ‌కు హామీ ఇస్తున్నాము. అంటే టోల్ సేక‌ర‌ణ అనేది జీపీఎస్ ద్వారానే న‌డుస్తుంది. వాహనాలపై ఉండే జీఎపీఎల్ ఇమేజింగ్ ద్వారా టోల్ సేక‌రిస్తారు అని గ‌డ‌ర్కీ వెల్లడించారు.
ఆ వాహనాలపై పోలీసు విచార‌ణ
ఇక ఫాస్టాగ్‌ల ద్వారా టోల్ చెల్లించని వాహనాలపై తాము పోలీసు విచార‌ణ‌కు ఆదేశించిన‌ట్లు కూడా ఈ సంద‌ర్భంగా నితిన్ గ‌డ్క‌రీ చెప్పారు. వాహ‌నాల‌కు ఫాస్టాగ్ లేక‌పోవ‌డం వ‌ల్ల టోల్ చోరీ, జీఎస్టీ ఎగ‌వేయ‌డంలాంటి ఘ‌ట‌న‌లు చోటు చేసుకున్న‌ట్లు ఆయ‌న వెల్లడించారు. 2016లో తొలిసారి ప్ర‌వేశ‌పెట్టిన ఈ ఫాస్టాగ్‌ల‌ను గ‌త నెల 16 నుంచి త‌ప్ప‌నిస‌రి చేశారు.