244 మంది వైద్యులు మృతి

కరోనాపై ముందుండి పోరాటం చేస్తూ బాధితుల ప్రాణాలను కాపాడటానికి నిరంతరం శ్రమిస్తున్న వైద్యులను కూడా ఈ మహమ్మారి బలితీసుకుంటోంది. గతేడాది తొలి దశలో దేశవ్యాప్తంగా 730 మంది డాక్టర్లు ప్రాణాలు కోల్పోయారు. రెండో దశ వ్యాప్తిలోనూ ఈ మహమ్మారి వైద్యులపై పంజా విసురుతోంది. ఈ ఏడాది ఇప్పటివరకు 244 మంది వైద్యులు ప్రాణాలు కోల్పోయినట్టు ఇండియన్ మెడికల్ అసోసియేషన్ (ఐఎంఏ) వెల్లడించింది.

అత్యధికంగా బిహార్‌లో 69 మంది, ఉత్తర్ ప్రదేశ్‌లో 34, ఢిల్లీలో 27, ఆంధ్రప్రదేశ్‌లో 21 మంది చొప్పున వైద్యులు కరోనా సెకండ్‌ వేవ్‌లో మృత్యువాతపడినట్లు ఐఎంఏ పేర్కొంది. మృతుల్లో 25 ఏళ్ల నుంచి 87 ఏళ్ల వయసుగల వైద్యులు ఉన్నారు. ఆది ఒక్క రోజే దేశవ్యాప్తంగా 50 మంది వైద్యులు కరోనాతో చనిపోయినట్టు తెలిపింది. ఇప్పటి వరకూ దాదాపు 1,000 మంది వైద్యులు కరోనాకు బలయ్యారు.

రెండో దశలో చనిపోయిన 244 మంది వైద్యుల్లో ఢిల్లీలోని గురు తేజ్‌బహదూర్ హాస్పిటల్ జూనియర్ రెసిడెంట్ డాక్టర్ 26 ఏళ్ల అనాస్ ముజాహిద్ అత్యంత పిన్న వయస్కుడు. డాక్టర్ అనాస్‌ కోవిడ్ నిర్ధారణ అయిన కొద్ది గంటల్లోనే మృతిచెందాడు. కోవిడ్ వార్డులో సేవలందిస్తూ మహమ్మారికి బలయ్యాడు.

డాక్టర్ ముజాహిద్ గతవారం ప్రాణాలు కోల్పోవడంతో స్నేహితుడు, సహచర వైద్యుడు డాక్టర్ అమీర్ సొహెయిల్ ఆ షాక్ నుంచి ఇంకా బయటపడలేదు. ముజాహిద్‌కు గొంతు నొప్పి వంటి స్వల్ప కోవిడ్ లక్షణాలు బయటపడటంతో యాంటిజెన్ పరీక్ష నిర్వహించగా పాజిటివ్‌ వచ్చింది. అయితే, కొద్ది గంటల్లోనే పరిస్థితి విషమించి మృతిచెందాడు. అతడికి మెదడులో రక్తస్రావం అయినట్టు గుర్తించారు.

‘ఇది షాక్‌కు గురిచేసింది.. అనాస్‌కు ఎటువంటి అనారోగ్య సమస్యలు లేవు.. ఎప్పుడూ ఎటువంటి ఆరోగ్య సంబంధిత సమస్యలను ఎదుర్కొలేదని తల్లిదండ్రులు చెప్పారు.. ఇలా ఎలా జరిగిందో ఇప్పటికీ అర్ధంకావడంలేదు’ అని స్నేహితుడు డాక్టర్ అమీర్ కన్నీళ్లు పెట్టుకున్నాడు. అనాస్ సహా మాకెవరికీ ఇంకా వ్యాక్సిన్ ఇవ్వలేదని అన్నారు. మరో రెండు రోజుల్లో వ్యాక్సిన్ తీసుకోనుండగా.. ఇంతలోనే ఘోరం జరిగిపోయిందని ఆవేదన వ్యక్తం చేశాడు. దేశంలోని కేవలం 3శాతం మంది వైద్యులకు మాత్రమే పూర్తిస్థాయి వ్యాక్సిన్ పూర్తయ్యింది.

దేశంలో వ్యాక్సినేషన్ ప్రక్రియ మొదలై నాలుగు నెలలు పూర్తయినా ఇప్పటి వరకూ కేవలం 66 శాతం మంది ఆరోగ్య సంరక్షణ సిబ్బందికి పూర్తిగా వ్యాక్సిన్ ఇచ్చారు. వైద్యులకు టీకాలు సత్వరమే అందజేయాలని నిపుణులు సూచిస్తున్నారు. ‘‘దేశవ్యాప్తంగా ఆదివారం ఒక్క రోజే 50 మంది వైద్యులను కోల్పోవడం దురదృష్టకరం.. రెండో దశ వ్యాప్తిలో ఏప్రిల్ తొలివారం నుంచి ఇప్పటి వరకూ 244 మంది వైద్యులు ప్రాణాలు కోల్పోయారు’’ అని ఐఎంఏ జనరల్ సెక్రెటరీ డాక్టర్ జయేశ్ లీలా అన్నారు.